لي كيتهرسلها الفقاص البلدي عند التقطاع تدخل

السر الالة هو مني تكوني كتطيبي الفقاص في الفران ديال الدار ماشي ديال الزنقة التطييبة الاولى تكون العافية مهيلة بزاف بزاف وتشعلي العافية غير من تحت وتخليه يطيب على خاطروا وخصوا ميتشققشي وملي تشفي الوجه ديلا الفقاص رجع ناشف ومبقاش عجينة يعني تخشي فيه شي عود وخرج ناشف ولكن خاص لفقاص يبقى لونه ابيض شعلي من الفوق العافية وتطفي لتحت مدة دقيقة او جوج دقايق المهم مايتحمرشي ومللي تخرجيه وضعي في البلاطو شي منديل نقي وضعي الفقاص ولفي عليه المنديل تم وضعي البلاطو في بلاستيكة وخليه يبرد مزيان ولكن متخلهشي بزاف باش ميبسشي ويلاكنتي مشغولة وضعي في الثلاجة ملي يبرد ثم قطعيه بموس رقيق بحال داك الموس اللس القبطة ديالو كحلة راه كيتبا بجوج دراهم تم ستفيه في الطاوة ديال الفران وطيبيه عادي راه فالتقطاع مكيعدبشي وماكيتهرشسي ابدا.

المقادير ديالي هما هادوا

6بيض /كاس وصف سكر سنيدة (كاس ديال شكلاط نسيلا) /كاس زيت /زافة لوز مقطع على جوج بشكل طولي /كاس شاي زنجلان ماشي مطحون /2معالق كيار نافع مهرمش /2خمارات /لافاني طحين تقريبا كيلو .
الطريقة هي تخلطي البيض والسك تم تضيفي الزيت تم تخلطي زيدي اللوز والزنجلان والنافع تم الخمارات مع الطحين تخلطي العجينة خصها تكون قاصحة مزيان ماشي خفيفة تم تحربلهوم تدهن بالبيض مع نسكافيه تشرطها بلفرشيط تم تدخلها الفرن وهو مازال بارد تم تطيبيه كيفما وريتكوم راه الطريقة مضمونة وجربو وقولولي