المقادير :
نصف كيلو سميد ناعم او الفينو
نصف كيلو فورص
ملح
خميرة العجين
ماء دافئ للعجن
الزبدة والزيت مخلطين للتوراق
الطريقة :
اولا نعجنوا العجينة ديالنا (وننقصوا شوية السميد من النصف كيلو
للتوراق )وندلكوها مزيان حتى تولي
تتطرطق وترطاب , نشكلوا منها كويرات متوسطين ونعملوا الزبدة تذوب ونخلطوها مع الزيت .
نسرحوا كويرة مزيان ثم ندهنوا بخليط الزيت والزبدة ونرشوا بالسميد
ونجمعوها بحال المسمن مربع نعملوا شي اربعة ولا خمسة .
نأخذ أول مربع نسرحوا شوية ندهنوه بالخليط الزبدة والزيت ونرشوا شوية بالسميد ونجمعوا الجناب حتى نحصلوا على كويرة مرة أخرى
* منين نكملوا العجينة نغطوها بشي بلاستيكة ونخليوا الكويرات يخمروا
والصورة غادي تبين ليكم أن حجمها يتضاعف .
نأخدوا المقلة الثقيلة نحطوها تسخن ونعملوا كويرة وسطها ونبسطها غير شوية صافي حيت كايجيوا صغارين المقلة راها تهز لي من أربعة حتى لخمسة على حساب حجمها .
ملاحظة : مجرد تسخن ليك المقلة نقصي عليها البوطة يعني تكون مابين مهيلة ومتوسطة وهذا باش يطيبوا ليك من الداخل ومايبقاوش خضرين .
وهاهما منين طابوا كايجيوا زوينين ومورقين وبالصحة والراحة
نتمنى انكم يكونوا نالوا إعجابكم وتجربوهم إن شاء الله
