السلام عليكم ورحمة الله وبركاته توحشتكم اخواتي كيف ديرين لاباس وهانا جيت كما وعدتكم مع وصفاتي الشخصية وتجاربي انا الاولى قبلكم وصدقوني انا ماليا لاناقة ولا جمل كيف ماكنقول ديما انني نغشك اختي ولا كنبيع كريمات وباغا ندير ليها الاشهار ولا عندي اي عداوة ضد الصالونات او خبراء التجميل لكن بصراحة كتبقى فيا كل اخت معندهاش تمشي لطبيب الجلد او تدير عملية تبييض او تجميل او تجمع باش تري بوماد وكريم وووو والله على قبلك اختي كنكتب نفيدك اوىىىى اللي معندوش يموت لااااااا معاي الحمد لله غتكوني ديما زوينة كيف ماخلقك الله حتى لو اهملتي نفسك بالمشاكل وقلة التهلي وووو الله يطلف بينا ويسهل علينا كاملين ويعطينا نور في نور من عند الله سبحانه وتعالى اليوم بمااننا داخلين على الصيف يعني معرضين للاسمرار بسبب الشمس وحتى الفواكه غتكون موجودة ورخيصة بالسوق برغم ان بلادنا الحمد لله الحمد لله غنية والفواكه كلها مكتخطاناش العام كامل الله يحفظ لينا بلادنا والفلاحة نتوعنا وكيف ماقلت هادي وصفاتي انا اللي كندير ديما ولولا مشاكل النت واقيلا طولت عليكم نخليكم مع الوصفة المقادير للبشرة الذهنية نصف خوخة او حتى خوخة كاملة الى كانت صغيرة معلقة حمص مطحون للبشرة الجافة خوخة معلقة زيت العود
البشرة العادية ممكن تخلط نص معلقة حمص نص معلقة زيت العود خوخ الطريقة اغسلي الخوخة اختي وخليها بقشرتها وحيدي العظم وطحنيها بالخلاط وخلطي معها بقية المقادير واذهني بيها وجهك وحتى عنقك لغاية صدر يعني كل المنطقة المعرضة للشمس خليها من ثلث الى نص ساعة واغسلي بالماء ويستحسن يكون بارد او من الحنفية يعني الروبيني او البزيوز يعني مايكونش دافئ وشوفي النتيجة وردي عليا الخبار ملحوظة; ممكن اختي تديري الوصفة 2 المرات بالاسبوع معلومات الوصفة اختي راه كتصلح كيف ماقلت بالعنوان _ لازالة اثر الحبوب _لازالة اسمرار الشمس _لوجه صافي وناعم مثل البيبي _وقناع مفيد للبشرة يغديها ويقويها اواا اختي رفعي يدك لله وادعي وقولي ياارب احفظ لينا بلادنا ونجي لنا احبابنا واحفظ لينا ملكنا وطول لنا بعمره ويخلي لينا البوليس ديما فايق وعايق باش نبقاو نغيشو بسلام وامان ويبقى المغرب ديما بلاد الخير والجود والله لاتغير النفوس ويبقى الشعب كله اخووت شي يحن في شي وشي يعاون شي يااارب تعطي لكل وحدة االلي نوات في خاطرها طالما في الخير وتدير تاويل الخير لكل وحدة اللي مزوجة يحفظ ليها ربي راجلها واللي باقا يجيب ليها ربي نقرة صافية يغبر فيها نحاسها واللي مريضة تتشافى واللي صحيحة يفظها ربي ويعافيها ويرحم والدين كل اخت دخلت تقرا الموضوع بما انها غتقرا كلامي وحتى اللي مقراتش ياارب احفظنا من السوء وقلالين النية وولاد الحرام وارزقنا الذرية الصالحة وقاد لينا البصر مع العمر واعطينا وارزقنا على قدر النفع وحنن قلوبنا على اليتامى والضعفاء والمحتاجين منتظرة اراءكم بالوصفة وردودكم وحتى اسئلتكم انا ديما رهن الاشارة واعذروني الى مجوبتش بسرعة فهذا خارج عن استطاعتي
