سلام حبيباتي
اليوم غادي نشارك معاكم واحد الحل سريع وعملي باش تنظفوا الزربية ديالكم
وتهناو من داك الشعر لي كيطيح عليها ولي مكتحيدو لا شطابة ولا ديك اللعيبة ديال ”باي باي”
طبعا شكون منا متيعانيش من هاد المشكل خصوصا في الزرابي ديال بيوت النعاس و ديال بيت الچلاس
مع تبارك الله السوالف غير مشتة ههههه
إوا يا لالة الحل اللي مريحني و مناسبني هو
الكاغيط الحرش الصفر لي تستعملوه النجارة
ولي كنا كنستعملوه زمااان فايام الدراسة وحكان الطوابل هههه
أيام وشمن أيام
إوا نرجعوا لموضوعنا تنخد طرف منو و نبدا بحالا تنمشط الزربية
وتدويزة خفيفة الشعر كلو تلصق فهاداك الورق
هادشي بلاما تحتاجي تصبني الزربية
و هي ناشفة ومفرشة فبلاصتها قومي بالعملية
وفي ثواني و بأقل مجهود تيمشي الشعر بلا عذاب
نتمنا نكون فدتكم
